盧生盧太

想唔出聲架啦,唔講又抵唔住頸。

講咩?個肥仔囉咪。

真係好撚煩,蘋果日報呢類咁既仆街報紙講完一日又一日,講夠未唧?喂,好大新聞咩?所謂「中國第一肥童來港求醫」,關人叉事咩?

不過算啦,大家都習慣左蘋果係仆街架啦,跟紅頂白,咩「八十後百萬年薪」咁既濕鳩野都做頭版,就知道呢個係咩報格。

呢類「睇人仆街」新聞,大把香港人中意睇,蘋果唔賣其他報紙都會賣,香港係deserve有呢類報紙,都唔可以怪晒佢。

無錯,見到呢位盧志豪小朋友我都覺得好眼寃。但我唔係怪個細路,最仆街既呢,其實係個肥仔既老豆老母。

頂佢個肺,個仔得五歲就搞到佢一百四十幾磅,BMI去到53.3。到而家肥到可以羅全國金牌啦,就周圍帶個仔求醫為名,招搖為實。死話個仔係有病,自己喪質個仔食野又提都唔提。

我想問阿盧生盧太,你地咩居心?你係咪覺得自己好威?

大佬,你地要出位就自己除衫裸跑啦,個仔係咪你地親生架?你有冇諗過佢既感受?呢一刻佢係食得好過癮呀,但係佢一大個D,肯定怨到你仆街呀話俾你聽!

健康唔駛講啦,仲有個樣呀!你地知唔知「肥是原罪」呀,佢而家唔係一般既肥,係肥撚到個醫生想摷佢粒蛋蛋出黎check下都摷唔到呀陰公!

以前聽過個故仔,有個老母縱容個仔細個偷野,後尾個仔愈偷愈勁,最後俾人捉左判死刑。臨行刑之前,佢話要同老母咬耳仔講d野,結果真係一啖咬甩左佢老母隻耳仔!佢個仔滿口鮮血,好似黃秋生咁lur左隻耳仔話:「點解當日你要縱容我?」

養不教,父母之過。為人父母,正常成年人,唔教仔女點先係正確飲食之道,唔同個仔女去做多d運動不突止,仲要係咁縱容佢食完又食。盧生盧太,我勸你地珍惜下而家隻耳仔仲黐住個頭既日子啦。

愈諗愈心寒,其實而家好多父母都係唔好得好多。

係咁質自己仔女食野,食到成個肥西咁,仲以為好撚得意。大家眼寃廢事出聲咋話俾你聽。

個仔女明明唔中意學呢樣學果樣,完全冇尊重佢既意願,質到佢個schedule full到七彩,搞到個人冇晒童年。

你地以為自己咁叫愛佢?醒下啦!

原來我地個社會,到處都係盧生盧太。